He tohu paerua tēnei ka whakaakona i roto i ngā wānanga 10 i ia tau, i ngā tau e rua, e Tā Tīmoti Kāretu rātou ko Pānia Papa, ko Leon Blake. Kāore he tuhinga whakapae i tēnei momo tohu paerua. Mātāmua rā ko te aro ki te whakapakari i te reo o te tauira e puta ai tana ihu hei toa whakarauora reo mō tōna hapori.

---

Ka pēhea tā tēnei tohu āwhina i a au?

He huarahi tēnei tohu paerua tērā pea ka koke ki ngā tohu kairangi o te motu, heoi, nā te mea e whakaakona ana ngā kōnae ako katoa o tēnei tohu paerua, ā, kāore ōna tuhinga whakapae, tērā tonu me mātua oti i te tauira ētahi kaupapa rangahau ki hea rānei, i mua i te āhei atu ki ngā tohu kairangi. Mā tēnei tohu koe e āwhina ki te tū hei toa whakarauora reo i tōu iwi, i tōu hapū, i tōu marae, i tōu whānau, waihoki i tōu hapori; hei kaiwhakawhiti reo; hei kaihāpai i te reo me ngā tikanga i roto i ngā momo ahumahi rerekē; hei kaipāpāho; hei kaiwhakaako reo; hei mātanga reo i te ao pakihi anō hoki pea.

Te tohu ka whakawhiwhia

Ina puta tō ihu i tēnei hōtaka, ka riro i a koe te tohu nei:

• Te Tohu Paerua o Te Reo Kairangi Taumata 9

I mua i tā te tangata uru ki te hōtaka nei:

• kua pakeke ake ia i te 18 tau; ā,
• kua mana ā-ture te kīia ōna he kirirarau nō Aotearoa (nō Ahitereiria rānei, nō Tokelau rānei, nō Niue rānei, nō Ngā Kuki Airani rānei) he tangata rānei e noho pūmau ana ki Aotearoa; ā,
• kua puta tōna ihu i tētahi whakamātautau ā-waharoa; ā,
• kua eke te kounga o tana reo Māori ki tētahi taumata teitei tonu; ā,
• kua eke te kounga o tana reo Pākehā ā-waha, ā-tuhi anō hoki ki te taumata e tika ana e taea ai e ia te ruku ngā āhuatanga o te whakawhiti reo; ā,
• kua tutuki hoki i a ia tētahi o ēnei o raro iho nei:
  • he tohu paetahi, ko te reo Māori tōna kaupapa matua;
  • he tohu paetahi kē atu me Te Pīnakitanga ki Te Reo Kairangi;
  • kua puta ia hei ika-a-Whiro i Te Panekiretanga o Te Reo;
  • kua 10 tau, kua neke atu rānei i tērā, te roa o tana ako rānei, o tana noho rānei, o tana mahi rānei i tētahi taiao ko te reo Māori tōna kaupapa matua.

Mēnā he ika-a-Whiro koe nō Te Panekiretanga o Te Reo, e āhei ana tō tono kia whakawhiwhia koe ki tētahi hautoru o ngā whiwhinga kei roto i tēnei tohu paerua, ki tētahi wāhanga e nui ake ana rānei i tērā. Mā ngā kaiako e whakatau te nui o ngā whiwhinga ka whakawhiwhia atu.

I te taha o tētahi o ngā tohu me ngā āhuatanga o runga nei me puta te ihu o te tangata i te whakamātautau ā-waharoa e āhei ai tana uru mai ki te tohu. He wāhanga kei roto i tēnei whakamātautau hei tohu i te kounga o te reo Māori me te reo Pākehā – ā-tuhi, ā-waha hoki tae atu ki tētahi wāhanga e whakaatuhia ai e te kaitono ōna pūkenga mātauranga e tika ai tana nohonga hei tauira ki tēnei hōtaka.

Me mātua uru ki tēnei tohu hei tauira ukiuki. E 240 ngā whiwhinga me riro i roto i te rua tau. Ka whakaakona ngā kaupapa i roto i ngā wānanga tekau (10) i ia tau ka tū i ngā wīkēne me ētahi rā o te wiki i ia marama, atu i a Hune ki a Mei mō ngā tau e rua. Me mātua tae mai koe ki ngā wānanga e 9 o ngā wānanga 10 i ia tau, e puta ai tō ihu, ka mutu, kotahi anake o aua mea e iwa rā e whakaaetia ana kia hono te tauira mā te ipurangi, mēnā he take whawhati tata ka ara ake. E rua ngā wānanga kua whakaroahia kia 5 rā te roa. He rite ērā wānanga roa ki ngā wānanga ā-wīkēne e rua. (Wenerei ki a Paraire = 1; Pō Paraire ki a Rātapu = 1)

I ngā wiki e rere ana te hōtaka, me whakaoti koe i ētahi mahi hei hāpai i ngā akoranga i ngā wānanga. Tōna 21 hāora ka pau i a koe ki te whakaoti i aua mahi rā. Ko ētahi o ngā mahi rā me oti i te whārangi ipurangi ka whakaritea. Me whai pūrere hiko koe e hono ana ki te ipurangi e tutuki ai ētahi o ngā mahi ka tukuna e ngā kaiako hei whakaoti māu.

Kirikiriroa (Mangakōtukutuku)

Te utu akoako i te tau 2025

• Te utu akoako o te tau 1: $6,508
• Te utu akoako o te tau 2: $6,508

GST inclusive