Skip Content
Rodney WHaanga - He Waka Hiringa.

Mahia te mahi hei oranga whakatipu, hei oranga tuku iho mō te iwi, ahakoa ngā piere nuku o te wā. Ko Rodney Whanga o Tainui waka, nō ngā iwi o Ngāti Maniapoto me Waikato te whakatinanatanga o te kōrero nei.

I riro i a Rodney te karahipi nei a Te Matatini Society Inc. Kapa Haka Scholarship Year 2 hei whakatutuki i te tau tuarua o tōna tohu paerua e kīia nei ko He Waka Hiringa i Te Wānanga o Aotearoa.

Ko tētahi wāhanga o ngā mahi o te tohu a Rodney, ko te hanga i tētahi taonga tuku iho hei oranga mō tōna iwi, mō tōna hapū, me ngā uri whakaheke.

Hei tā Rodney, "ko te ia o āku mahi ko te hautū, me te tito waiata mā te kapa haka o tōku hapū a Ngāti Pourāhui e kīia nei ko Toto Kiore, nō reira mā te karahipi nei e āwhina i ahau ki te rangahau me te hanga i tētahi taonga tuku iho, arā, he pukapuka o ngā titonga waiata nō roto i ngā tau nei.”

He mea hanga e Rodney rāua ko tōna tuakana he rautaki whakarauora i te reo o tōna hapū, nā konā i ara ake ai tāna kapa haka nei hei rautaki ”whakakīkī i ngā whāruarua o te pae.”

Hei tā Rodney, ”kei roto i ngā mahi o te haka te oranga o te paepae, whēnei i te karanga, i te whaikōrero, me te mōteatea.”

He mea wakatenatena a Rodney rātou ko ana hoa mahi tokorua e Te Kohanga Reo kia mahia tēnei tohu e āhei ai rātou ki te whakawhanake ake i tō Te Kohanga Reo tohu whakangungu kaiako mai i te tohu pōkairua ki te tohu paetahi. I whakamahia e Te Kohanga Reo ngā mahi o te paerua a Rodney ki te whakaaweawe i ngā kaimahi o Te Kohanga Reo ki te whai i te tohu nei.

Hei tā Rodney, ”ko tāku whāinga nui ko te whakatutuki i tōku tohu kairangi, e āhei ai taku whakatipu i tētahi kaupapa paerua i roto i te kaupapa whai mātauranga a Te Kohanga Reo.”

E ai ki a Rodney, ”ko te nuinga o tāku mahinga i tohu nei i māmā noa te haere o ngā mahi nā te pai o aku kaiako, arā, ko Ahorangi Agnes McFarland rāua ko Hohepa Tamehana ērā e ārahi ana i te taha ki te ao Māori, ā, ko Ahorangi Benita Simati-Kumar hoki tērā, waihoki nā Benita ahau akiaki ki te mahi i tōku tohu katoa ki te reo Māori".

Tērā tētahi wā i tata whakarērea e Rodney te tohu nei he pā mai nō ngā taumaha hārukiruki o te wā, arā, ka riro atu tōna pāpā ki tua o Paerau. Engari nā ngā manaakitanga a te kaiako o Rodney, arā, a Agnus McFarlane i ū ai a Rodney ki tōna tohu.

Hei tā Agnes, ”whakamahia tō tuhinga hei kaupapa whakaea i tō aroha ki tō pāpā ka whakauru ai ō kare ā-roto mōna ki ō tuhituhi."

Ko te pāpā o Rodney te iho pūmanawa nui katoa i tōna ao e whāia nei e ia te huarahi e takahi nei ia.

”E mau mahara ana ahau i taku taiohitanga, i Tūranga Waewae Marae mātou, ā, ko tōku pāpā tērā e mahi ana i ngā mahi o te rākau matataki me ngā mahi whakangahau i roto i ngā kapa haka huri i ngā Poukai, koirā tētahi maumaharatanga titi nei ki tōku ngākau e kore rawa e warearetia e ahau. Ko tōku pāpā te whakaaweawenga nui katoa o tōku ao.”

Whai mōhio anō ki He Waka Hiringa me Te Kōpuretanga o Te Wānanga o Aotearoa.



 Back to news & events

Published On: 09 May 2024

Article By: Te Kanapu Anasta



Other Articles

  • 02 April 2025

    Following the footsteps of her māmā: Haani Huata-Allen's path to PhD

    Follow the inspiring journey of Haani Huata-Allen, inaugural recipient of the Te Manawahoukura Residency at Te Wānanga o Aotearoa. Learn how this groundbreaking residency supports kaimahi in their Rangahau projects, allowing Haani to focus on her PhD in Reo Revitalisation through Kapa Haka. Discover the impact of Indigenous research and the importance of continuing education inspired by her mother, Dr Te Rita Papesch.

  • 27 March 2025

    A whakairo journey shaped by art and community

    Murray ‘Muzz’ Green (Te Kanawa, Ngāti Maniapoto, Whatakaraka, Ngāti Mahuta, Ngāti Te Kiriwai, Ngāti Tuwharetoa, Ngāti Rangitihi, Ngāti Ngutū, Whānau-a-Apanui and Ngāti Porou) left school at 15 when he realised conventional education wasn’t for him.

  • 20 March 2025

    Nāwai i tauira, kua kaiako

    Ahakoa he rerekē noa atu te ao i tipu ake ai a Rob Bromley i tāna e mōhio nei i tēnei rā, nō te ohinga ake, ka rongo ia i tētahi hao ki te reo Māori.

  • 10 March 2025

    Te Wānanga o Aotearoa recognised as leader in Māori HR

    Te Wānanga o Aotearoa was awarded the prestigious Mana Tangata Award at the 2025 NZ HR Excellence Awards on Thursday 27 February in Tāmaki Makaurau.