Skip Content

Mō ētahi he mea mataku te reo Māori, ā, ko te whakaaro mō te maumahara ki ngā tini kupu me ngā tini whakatakotoranga o te rerenga kōrero, he mea kei tawhiti pāmamao. 

Nā konei kuhu mai ai a Rosie Remmerswaal rāua ko Kuruho Wereta, ngā kaiwhakaara o Kura Rēhia. E rongoā ana rāua i tēnei āhuatanga me tā rātou kēmu panga a KAUPAPA.

“Ko te tūmanako ia kia whai wāhi mai a Aotearoa whānui ki ētahi whiringa e māmā ai, e pārekareka ai te kuhu ki te reo me te ao Māori. Me noho te reo Māori hei kaupapa pārekareka i waenganui i te whānau me ngā hoa,” te kī a Rosie.

E kīia nei a KAUPAPA, he kēmu mā Aotearoa reorua, e whakamahi nei i te reo Māori me te reo Pākehā hei whakawhānui ake i te puna kupu i roto i te ‘wairua pukuhohe’.

I toko ake te whakaaro mō te kēmu nei i a Rosie rāua ko Kuhoro e noho tahi ana, ka ara ake te hiahia ki te whai wāhi atu ki tētahi wheako e ako ai i te reo Māori i te wā o te ngahau me te takaro, ā, ka whānau mai ko KAUPAPA.

“I te tīmatanga he mea hanga noa hei tākaro mā māua ko ō māua whānau, ō māua hoa me ō māua akomanga reo Māori. I a māua e tākaro ana ka kite māua i te manawa reka me te hihiri o ngā tāngata i tākaro tahi ai ki a māua, ā, ka tipu haere te kaupapa nei. Nā konā toko ake ai te whakaaro kia whakaara ōkawatia te kēmu nei kia whai wāhi mai ai a Aotearoa whānui,” te kī a Rosie”.

He mea hanga te kēmu nei kia whai wāhi mai ai te kaitākaro ahakoa te taumata o tōna reo Māori. He mea whakaako kupu hou ki te tauhou, ā, ka taea e te kaikōrero matatau ki te whakatere ake i te kēmu ka noho rūmaki ai i roto i tētahi horopaki ngahau.

“Ahakoa ngā pūkenga rerekē o ngā kaitākaro, ka taea tonu te tākaro ngātahi – hei tauira, ka āhei te whakahāngai i te taumata o te kaitākaro ki tētahi o ngā taumata e toru o te kēmu e wero tonu ai te kaitākaro. I a mātou e waihanga ngātahi ana i te kēmu me te hapori, i kite māua te whai wāhitanga mai o ngā taumata reo katoa,” te kī a Rosie. 

Mā te kauawhi i te ao Māori me te reo, e whakapono ana a Rosie he huarahi e mārama ai tātou ki ngā tirohanga o ngā iwi taketake e huri ai ō tātou whakaaro ki tēnei mea, ki te tūhonohono tētahi ki tētahi me te ao e noho nei tātou.

Mai i tōna whakarewatanga i te marama o Mei 2021, kua huhua te rere mai o ngā mihi mai i ngā kura me ngā whānau anō hoki e whakamahi nei i te kēmu hei rauemi ako, hei huarahi e whai wāhi ai ki te reo Māori mā te tākaro me te ngahau.

“Mōku ake, ko tētahi mea nui katoa ko te hihiri nui e ara ake ana i te tākaro ngātahi. He mea hirahira nui, he mea whakaora i te ngākau. He orange wairua tōna”, te kī a Rosie.

I tēnei wā e mahi tahi ana a Rosia rātou ko te rōpu o Kura Rēhia ki te whakawhānui i te panga kāri o KAUPAPA kia tukuna i mua i te mutunga o tēnei tau, engari i tēnei wā, e tūmanako ana rātou kia nui ake te kauawhitia o te ako i te reo Māori mā te tākaro.

“Ko te anga whakamua, ko te tūmanako kia noho a KAUPAPA hei hoa haere mō te tangata e ako ana i te reo ā-takitahi nei, ā-whānau nei, ā-kura nei, ā hapori nei rānei. He rerekē i ia tākarotanga, he pārekareka i ia tākarotanga. He mea ora tōna pitomata ki te whakaara i tētahi āhuatanga hou i ia tākarotanga.”

Toro atu ki te pae tukutuku o KAUPAPA ki te kite i ētahi atu taipitopito, ki te hoko rānei i tāu ake kēmu.

Photo credit Aroha Tamihana

 Back to news & events

Published On: 13 October 2023

Article By: Cassia Ngaruhe



Other Articles

  • 01 December 2023

    Wānanga kaiako and small-town gym owner wins NZ Exercise Award

    Kaitaia local Dena-Maree Hemara (nō Te Māhurehure me Ngāti Rangi) wears multiple pōtae – business owner, kaiako, contractor, māmā – and now she can add NZ Exercise Award winner to that bundle.

  • 09 November 2023

    Waka ama, culture, and community in Masterton

    This weekend, Masterton will welcome waka ama teams affiliated to Hoe Tonga for the Regional Sprint Championship.

  • 31 October 2023

    Finding her place within toi Māori

    Being able to connect multiple aspects of her personality has opened many doors for Ōtautahi raranga tauira, Ngaio Cowell.

  • 26 October 2023

    Weaving connections for herself and her community

    Claire Aldhamland never could have predicted where she has ended up since studying at Te Wānanga o Aotearoa. She’s discovered a passion for raranga and created meaningful connections within her community.