Kei te pītau whakareia o te ao nekenekehanga Māori a Beez Ngarino Te Waati.
Ko Beez rāua ko tōna hoa rangatira a Kura Te Waati ngā upoko o te pakahi Hawaiki Tū e whakatere ana i ngā mahi a te Rēhia ki te toi o ngā rangi.
He kaiako hoki a Beez i Te Wānanga o Aotearoa. Kua riro māna ngā kaupapa e rua e whakaako, arā ko te Kawai Raupapa me te Nekehanga Māori(Māori Movement) taumata tuatoru.
“Nō māua tahi te whakaaro rangatira kia tuitui ai ngā whakaaro e pā ana ki te haka tapere. Tuatahi mai i roto i tā māua nei kamupene a Hawaiki Tū, kātahi ka whai whakaaro māua ki tētahi huarahi mō ngā rangatahi kia whai i ngā pūkenga pēnei i te kapa haka, te mahi whakaari, te mahi kanikani, nekeneke rānei.”
Nā konā i toko ake te kaupapa Māori movement. Ko Tuki te Rangi Curtis tētehi o ngā mātātoa mau rakau i āta poipoi ai i te kaupapa. I takea mai ētahi nekehanga waewae o neherā, ngā mahi mau rākau, tāpiri atu ko ngā korikori tinana nō te ao Jiujitsu.
“Ko te nekehanga Māori he mea whakangungu mā tātou, kia whakakoikoi i te tinana, te wairua, te hinengaro, te ngākau.”
Kāore he mahi i kō atu, i kō mai i te whakaako i Te Wānanga o Aotearoa mō tēnei uri nō ngā kāwai rangtira o Tauranga Moana me Waikato.
“Kua hoki mai au ki Te Wānanga o Aotearoa ki te whakamahi i aku mahi kia whāngaihia ēnei tāonga tuku iho. Ko te tino mahi kia whāia ko te pitomata o ia tauira.”
Kua kitea e ia, i roto i ngā tau, te puawaitanga o āna tauira e tōngakengake ana ki te takahi i tēnei huarahi i te tau kotahi.
“Ka whakaeke mai te tauira i raro i te āhua o te matakū, kātahi ka eke panuku ki te hurihanganui, kua huri tō rātau ao. Kua hipa i ō rātau whāinga matua. Ko te pae tawhiti whai muri i tērā, kia whakaatu ki te ao, anei te ātaahua, anei te ranginamu o te tangata Māori.”
